Browsing "滅氏租移 ● 每日一字"

每日一字:Greenwich



呢個復活節假期一如以往好多人去旅行,去陽光海灘嘅有,去睇櫻花嘅有。等我今日就講一個有關旅遊、地理、時差嘅字。

如果平時有留意嘅話,好多時我地註冊一啲社交網絡或者討論區嘅賬戶,會被問到嚟自邊個時區。一點個選項列,會見到 GMT+1, GMT+2, GMT+3… 如此類推。香港嘅時區屬於 GMT+8, 而 GMT 嘅意思就係 Greenwich Mean Time, 即係格林威治標準時間,係以前嘅人決定爲 0° 經線嘅位置,然後每 15° 為一個時區,去將地球分為共 24 個時區。

位於倫敦嘅 Greenwich, 睇呢個字個樣好似好易讀咁,諗住先讀綠色嘅 green, 然後跟個 sandwich 個 wich 就實無死。但係原來呢個字好似好多英國嘅地區名同人名咁,怪怪地,個讀法完全唔跟個串法。

Greenwich 呢個字讀 gren-nich:gren 同 ten, pen, men 押韻,有啲似 grandmother 個 grand, 不過個口擘細啲,同埋唔駛要個 d 音;而 nich 同 rich, which, bitch 押韻,只係字母 N 開頭。成個字 gren-nich, 可以話將 Greenwich 拎走一個 E 同一個 W 字母咁睇就啱喇。

大英帝國真係有好多地區名係唔跟個串法讀,以後一有機會就同大家講解吓。之前有提過嘅 Cambridge 同 Edinburg, miss 咗嘅朋友亦可以參考番。

Cambridge: http://www.missjoey.com/?p=133
Edinburgh: http://www.missjoey.com/?p=2906

每日一字:posture



Post 呢個字用途廣泛—香港郵政 Hongkong Post, 日日睇好多嘅 Facebook post…..大家應該都讀得啱,讀「鋪排」個「鋪」,然後多數人只係加個 S 音,如果加埋個 T 音就更叻,即係 “鋪-s…t…”. 但係指姿勢嘅 posture 呢個字大家又點讀嘅呢?

好大機會大家見到佢個串法一開頭係 post 所以都係讀「鋪」。但其實呢個字嘅第一節並唔係讀 「鋪」,而係讀同 saw, law 押韻嘅 paw, 而第二節就照平時咁讀就可以,即係話 paws 然後讀 teacher 個 cher— paws-cher.

呢個亦唔係關英式或美式嘅讀法,無論邊個式都係咁讀架!咁你亦快啲由香港式學番正確嘅讀法啦!

每日一字:eight



今日趁初八教一教想講咗好耐嘅 eight!

你會唔會好似好多人咁都係將 eight 讀成「打施 egg」或正寫「打嘶餩」個「餩」後面加個 t 音呢?其實 eight 嘅讀法同另外一個大家好熟悉嘅字係同音字,而嗰個字就係 eat 嘅過去式 ate 喇。

Eight 同 ate 個讀法係完全一模一樣,先 A, 然後後面加個 t 音。注意一定要聽到個好清晰嘅 A, 讀咗 egg 或者「餩」都唔啱架!大家都一齊趁初八開始讀番啱呢個字丫!

每日一字:new



新年流流,等我教大家讀番啱 Happy New Year 個 New 字先!

當然搞笑嘅時候,可以讀 Happy 撩 ear, 好似撩耳仔咁。正確啲讀嘅話,有美式或英式兩個讀法。先講容易啲嘅美式讀法。New 係讀 “noo” 音,即係同 to, do, 同埋同 Captain Koo 個 Koo 押韻嘅 “noo”. 試吓讀一次 “Happy Noo Year” 咁,啱喇。

至於英式讀法,就係先讀字母 N 嘅拼音,即係鼻音 “nnn…” 然後讀「你」嗰個 you. “Nnn…you” 咁樣。唔慣嘅話係有啲怪,不過確實係咁讀。

除非本身學過拼音,如果唔係嘅話英式個讀法會有啲難明。所以建議可以學住美式讀法先,因為差別好少,或者打 28700666 我免費真人示範俾你聽,順便等我地同對方拜個年都好呀!

Pages:1234567...15»