上星夢郵輪世界夢號玩嘅小撇步

上星夢郵輪世界夢號玩嘅小撇步

啱啱喺九月尾去完星夢郵輪嘅世界夢號越南之旅
今次係我哋第二次上星夢郵輪
上次係上世界夢號嘅姊妹船雲頂夢號
即係兩者裡面嘅餡係一模一樣嘅
住普通級裡面最貴嘅海景露台房去沖繩同宮古島
我同我先生都好鍾意
但見到人哋皇宮套房啲住客有自己嘅範圍
自己嘅游泳池
覺得好羨慕
於是畀佢「呃」咗去今次畀多少錢
住皇宮套房,不過係最低級嗰隻
即係比上次高一級
我哋以上就仲有三種嘅套房
但我哋已經覺得非常喜歡

我作為一位慳錢達人
將兩個級別嘅分別衡量咗一大輪
如果住返上次個級別嘅房間嘅話
可以比少 $2400
畀多 $2400 住皇宮套房嘅話
喺佢地要畀錢嘅餐廳度可以有 5 餐特色套餐
用普通速度嘅 wifi 唔駛錢
有只供皇宮套房客人用嘅游水池
同埋靠岸嘅時候有免費接駁巴士去市中心
因為個總數真係幾大
比我哋平時去嘅旅行貴
所以係真係計完一大輪之後先下定決心試吓皇宮套房
旅程完結之後我可以肯定地話俾自己聽
我嘅選擇係正確嘅

譬如唔知點解隻船雖然有其他人
但我哋每次落腳喺邊一度
就會冇晒人
可能我啲負面能量太強勁啦
如果有人做緊星夢郵輪嘅資料蒐集
我唔夠膽擔保你地一樣有我哋咁清閑安靜嘅環境
但我有以下小撇步可以同你地分享
(留意番以下大部分嘅小撇步只適用於皇宮套房嘅住客)

1) 上六日五夜旅程住皇宮套房嘅人客每人全程可以揀五間特色餐廳去免費享用套餐,一日只能去一次,每間餐廳亦只能夠揀一次。船上一共有六間特色餐廳,我會建議海鮮坊同扒房一定要揀,因為又貴又好食;中菜廳絲路花舞嘅中菜都好正,仲要佢係唯一一間無限任添嘅特色餐廳,但兩間日本餐廳就千祈唔好揀,一間佢話係鐵板燒,其實係喺個鐵板度炒啲超級市場質素嘅食物俾你,另一間話係壽司餐廳,其實個特色套餐係便當,同吉野家嘅質素差唔多,係咪好驚呢?

我哋今次冇試火鍋店,不過上次喺雲頂夢號就有,覺得牛度嘅質素好麻麻。即係話如果上六日五夜嘅朋友要硬食一兩餐唔好食嘅特色套餐,但上三日兩夜嘅話,我建議你揀海鮮坊、扒房同中菜,就可以三餐都好好食喇!☺️☺️☺️

2)雖然 15 樓有個高級啲嘅 spa,但其實 5 樓嗰個都唔失禮,裡面有個水果吧,任食水果同任飲檸檬/青瓜水,仲有個熱力咩室,裡面有個好大嘅 jaccuzi 可以畀你喺裡面拉筋、做水中運動,同埋有兩張 hot stone beds,幾舒服,我初初以為就咁兩張櫈喺度唔知做乜。經過兩次上船嘅經驗,總括嚟講,我個人嚟講唔會再去 15 樓個 spa,只去 5樓。

3)17 樓係皇宮餐廳,即係一日有四個時段食免費自助餐嘅地方,食嘢嘅時候只有有限嘅嘢飲免費叫,譬如汽水、果汁、紅白酒、啤酒,但其實船上面唔同層數都有好幾間酒吧供皇宮套房嘅客人可以免費叫好多嘢飲,包括 鮮榨果汁、mocktail、cocktail、brandy、whiskey,特別係都係喺 17 樓嘅 lounge + 酒吧,你同佢講你要攞個飲品去甲板(游水池),佢會換成膠杯,咁佢就可以攞上 18 樓泳池邊嘆!☺️☺️☺️

4) 呢個 lounge 除咗 24 小時都有曲奇麵包放喺度畀人客醫肚,更會喺某啲嘅晏晝時間有免費三層下午茶,記住留意番時間表係邊日,千祈唔好錯過,因為都幾好食。

5)你可以叫任何一間餐廳嘅食物 room service 不過要加收 $25 服務費

6)又係 17 樓個 lounge——其實原來佢有個 24 小時嘅食物 menu,我地最後一日先知,好 hurt 😂。

如果嚟緊你會上船嘅話
希望幫你地慳咗啲時間
畀你知道點樣盡情啲享受你嘅船上旅程
然後同我地一樣玩得咁樂而忘返
有任何問題可以去我 Miss Joey’s Hyper Life Show Facebook 專頁問我



Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.