Chiang Mai Spring '15- Huay Tung Tao Lake

嚟得清邁,預備接觸好多大自然。而大自然咁多 item 裏面我最鍾意就係水。因為清邁唔係一個沿岸嘅城市,所以唔會有海灘同海上活動。但呢度有河、湖同埋瀑布。

我地今次留嘅日子唔算長,於是揀一個近近地嘅 Huay Tung Tao Lake,坐雙排車二十分鐘倒就到。個湖大得嚟一眼望晒,大概30分鐘可以行晒一圈。有一邊係背住一列嘅山脈,畫面好靚。

呢度嚟嘅人大部份係本地人或者喺清邁住嘅外國人。聽講呢度平日嚟嘅話更加少人,感覺更加悠閑,因為啲本地人都係等周末過嚟。我哋就唔到時間,只能夠星期六嚟,人流覺得可接受,起碼一粒遊客都無。

呢度好多大人細佬會喺湖邊玩水,但我地到嘅時候啱啱落咗一場過雲雨,Francis 話呢個時候嘅水最唔乾淨,所以我只係留喺淺水地方行吓、企吓,都叫做濕咗水,好開心!呢度如果唔游水嘅話,仲可以租水上電單車同租水泡坐。

湖邊圍住一行行、一組組嘅草屋,你可以當每一組係一間餐廳咁,由唔同人負責經營,俾人乘涼同叫嘢食叫嘢飲。或者如果自己帶食物飲品嘅話可以淨租草屋。

有人話俾我聽因為內地遊客無興趣嚟呢啲地方,所以呢度係我哋成個清邁 trip 唯一一度冇周圍寫晒簡體字嘅地方,好感動。



Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.